Свята Маці Божай Фацімскай

Чацвер, 14 Май 2015 13:28 Аўтар 

Цішыня наўкол касцёла крыху падманлівая. Бо ўнутры храма няма ніводнага свабоднага месца. Ціха гучыць малітва ружанцовая да Маці Божай Фацімскай. Сёння менавіта Яе свята. Ўсе чакаюць нечага асаблівага. Так і ёсць. Адпраўляць сёняшнюю Святую Імшу прыехаў арцыбіскуп Тадэвуш Кандрусевіч, мітрапаліт Мінска-Магілёўскі.

 Ад імя прысутных парафіян мітрапаліта вітае старшыня касцёльнага камітэту Яўгеній Лабкоўскі

Пробашч парафіі кс. Міхаіл Цвячкоўскі МІС вітае арцыбіскупа і запрашае яго цэлебраваць Святую Імшу.

І вось настае кульмінацыйны момант. Арцыбіскуп Тадэвуш Кандрусевіч удзяляе Сакрамэнт Канфірмацыі. 

Амаль сто чалавек паўгода рыхтавалася прыняць гэты сакрамэнт. Разам з Хростам і Эўхарыстыяй сакрамэнт канфірмацыі (бежмавання, мірапамазання) складае сукупнасць сакрамэнтаў хрысціянскага пасвячэння. Праз яго ўсе ахрышчаныя ўзбагачаюцца асаблівай сілай Святога Духа. Гэта пячатка міра ў выглядзе маленькага крыжыка, які наносіць біскуп на лоб кожнага, хто прымае сакрамэнт, азначае, што ты ўжо цалкам належыш Хрысту, будзеш служыць яму назаўсёды. Але гэтак жа і абяцанне Боскай абароны ў вялікім эсхаталагічным выпрабаванні.

 

Са словамі падзякі да арцыбіскупа звярнуліся вернікі, якія толькі што прынялі Сакрамэнт Канфірмацыі.

У сваёй прамове мітрапаліт адзначыў веліч сёняшняга моманту ў жыцці парафіі. Свята Маці Божай Фацімскай, імя якой носіць жодзінская парафія, найлепшым чынам звяртае ўвагу на неабходнасць пашаны Фацімскіх аб'яўленняў, руплівасці ў выкананні наказаў Маці Божай праз малых пастушкоў. Арцыбіскуп прыгадаў, што яму давялося асабіста тройчы сустракацца з жывою сведкаю Фацімскіх аб'яўленняў Маці Божай - сястрой Люцыяй.

Заўсёды актуальны заклік Марыі з Фацімы “маліцеся і навяртайцеся”, заклік, які паўтарае падобны заклік Хрыста да малітвы, навяртання і веры ў Евангелле», — падкрэсліў арцыпастыр.

У кароткім артыкуле немагчыма перадаць усю атмасферу, ў якой праходзіла сустрэча з мітрапалітам. Сур'ёзныя праблемы і наказы змяняліся гумарам і вясёлымі жартамі, эмацыянальныя словы арцыбіскупа заўсёды кранаюць сэрцы слухачоў і застаюцца ў іх памяці надоўга. А сакрамант канфірмацыі асабліва. Ён адзін раз у жыцці.

 

Прачытана 1885 раз Апошняе змяненне Пятніца, 15 Май 2015 21:27
Іншыя матэрыялы ў гэтай катэгорыі: « "Рыбы" чакаюць вашай падтрымкі Праца ў радасць »